Sekretè Deta Alasekirite, Patrick Sully ke gouvènman an chaje pou founi je gade sou dènyè problematik mizèrere Nòdwès la afiche awogans ak demagoji

12 – 29 – 2024

Pòdpè, Ayiti____(Triboland) Nan moman Patrick Sully tap fè ti bat bouch ak diferan otorite local nan Delegasyon Pòdpè a, plizyè nan patisipan yo ki tap eseye konpran ki sa yon plan ijans gouvènman ye, nan kad inondasyon ki mete Nòdwès ajenou nan lanwit 24 pou rive 25 desanm 2024 la, se te konfisyon total kapital.

Se evidan, jis kote ke li ye nan Pòtopwens nan kad demach pou li double yon inyèm manda nan vil Pòdpè, majistra Josué Alusma, yon pèsonaj trè deste, te arive fè bwas pou kreye “task force” konpoze avèk plizyè antite. Konsa, gouvènman ayisyen ki genyen nan tèt li Premye minis Alix Fils-Aimé, ta pral chaje Mesye Sekretè Deta Alasekirite a, Patrick Sully kòm otorite reprezantif nan kad chita ak otorite lokal yo pou define yon plan dijans, destine pou asiste Nòdwès ki plonje anba yon inondasyon san parèy.

Antouka, selon enfo yo, anpil moun pat wè klè nan wòl Sekretè Deta, Patrick Sully a ki te yon tijan parèt trè awogan endesi; anplis “task force” la ak wòl Mesye Sully te mal akòde. Konsa, sa te deja bay enpresyon ke se yon veritab demagoji ki tap manniganse. Pou anpil moun, te genyen anpil feblès pou atikile volonte gouvènman an byen; ta sanble se yon seri teyàt ki moun wè deja nan depatman Nòdwès la; sitou nan  moman kote otorite anplas yo deja ap fè fas ak yon defisyans nan nivo kredibilite. Pou majorite a, annyen pa jamè al jwen popilasyon an, sitou avèk gro deba kap fèt nan yon dosye 30 milyon goud ki fè fon nan pòch otorite kriminèl kwonik Nòdwès yo.

Antouka, sitiyasyon popilasyon Nòdwès la, fas ak demach pou inisye yon plan dijans anfavè sinistre yo ta sanble vle pase nan farinn. Selon enfòmasyon yo, yon kantite 20 kamyon te epapiye atravè vil Pòdpè nan kad pote boure pou yon netwayàj sistematik; sepandan ta sanble se yon veritab “Fyasko”! Se vre kamyon yo ap trese lèl, sepandan konsta yo montre se lave men swiye atè, yon travay bouki kap efektye. Kamyon yo ap ranmase debri tout kalite, men dèyè kamyon yo pafèmen, konsa machinn yon ap lage debri yo sou tout wout. Kidonk, yo genten menm avid menm avan yo rive nan zòn depotwa yo. “Donk pa gen anpil ki rive nan sit dechaj vre. Kamyon sa n ap gade la pa menm rive Lasalin. Msye yo lage yon kamyon labou nan yon jaden bannann aprè pon Twarivyè a. Fòk nou rete vijilan paske nou poko menm nan yon mwatye travay yo. Sonje Lasalin pa fèt pou sa paske se yon zòn agwo-ekolojik ki ta dwe yon espas pwoje akoz mangwòv la. Men elas”, daprè jounalis profesyonèl, Wilgens Devilas.

Nan sans sa, li enpòtan pou genyen yon “Task Force” ki dekoule avèk moun serye ki pap asèpte fè konpwomi ou tranzaksyon ilegal ak otorite dezonèt yo ki toujou vle jwen benefis pa yo avan otorizasyon yon seri travay ijans. Yon parèy “Task Force” dwe genyen yon seri figi kredib ki kapab travay ak diferan antite nan diaspora a sou yon baz onèt e serye.

Nap raple, mete sou pye yon seri demach pou asiste yon zònn sinistre nan peyi Dayiti, se yon kochma. Eksperyans montre raketè tout plim tout kalite toujou kanpe anfas pou revandike moso kado pa yo chak fwa genyen katastròf natirèl. Politichyen kwonik, toujou chwazi pou pa wè lakolektivite dabò. Yo plis vle vann yon imaj fatra ak povrete, pou yo kapab toujou solisite èd. Konsa, tout èd ak sipò, toujou finalman pase nan lòbèy ak kòripsyon; konsa, problèm yo rete pou letan e pou letènite.

San pèsònn moun pa ta swete wè echèk fas ak agoni popilasyon Nòdwès la; sepandan, endis kòdinasyon yo fas ak enòmite bezwen yo deja montre ke “se charye dlo nan pane banbou kap fèt” e yo egalman montre nan ki nivo demagòg ak enkonpetan kontinye sèl kòk chante nan baskou pote sekou bay yon pèp kap naje nan mizè dig datan.