Nekroloji : Mèt Dieunel Thelusma mouri apre yon kout maladi

08/11/2026

Pòdpè, Ayiti ______(TRiboLAND)Se avèk anpil tristès nouvèl lanmò Mèt Dieunel Thelusma ap sikile nan kominote Pòdpe a ak nan plizyè lòt sektè nan Nòdwès la. Pratisyen an Dwa a rann dènye soupi li apre yon kout maladi, kite fanmi li, zanmi li, kòlèg li ak tout moun ki te konnen l nan lapenn.

Mèt Dieunel Thelusma te yon figi ki te angaje nan plizyè domèn nan lavi sosyal ak pwofesyonèl Pòdpè. Li te fè pati Kòporasyon Tribinal de Pè Pòdpe a, kote li te mete konesans li ak eksperyans li nan sèvis jistis. Anplis aktivite li nan domèn Dwa, li te yon anseyan ki te sèvi nan plizyè lekòl pandan plizyè ane. Nan mitan kominote edikatif la, li te toujou leve vwa li pou defann pi bon kondisyon travay pou anseyan yo.

Angajman Mèt Thelusma pa t limite sèlman nan domèn Dwa ak edikasyon. Li te patisipe tou nan lavi politik peyi a, sitou nan Nòdwès. Li te yon militan politik e li te reprezante pati politik Viv Ayiti nan depatman an. Angajman li te fè l rete pre reyalite sosyal ak politik kominote li a, kote li te konn eksprime pozisyon li sou plizyè kesyon ki konsène sosyete a.

Moun ki te konnen Mèt Dieunel Thelusma dekri l kòm yon moun ki te boure ak sajès, yon moun ki te konn sèvi ak pawòl li ak eksperyans li pou pote konsèy ak refleksyon. Lanmò li reprezante yon gwo pèt pou fanmi li, zanmi li, kòlèg li yo ansanm ak moun ki te abitye pataje ak li nan diferan domèn lavi.

Disparisyon li toudenkou vini kòm yon gwo chòk pou moun ki te pwòch li. Fanmi, zanmi, kòlèg ak moun ki te konn apresye angajman li ap fè fas ak yon moman douloure pandan y ap rann omaj bay memwa yon nonm ki te make plizyè sektè nan kominote Pòdpè a.

Mèt Dieunel Thelusma ale, men tras li kite nan domèn Dwa, edikasyon ak lavi politik la ap rete nan memwa moun ki te konnen l. Fanmi, zanmi ak tout pwòch li yo resevwa kondoleyans nan moman doulè sa a.