CEP lanse gwo fòmasyon pou jounalis nan Nòdwès sou etik ak kouvèti elektoral

05/05/2026

Pòdpe, Ayiti _____(TRiboLAND) Konsèy Elektoral Pwovizwa (CEP) pran yon nouvo inisyativ pou ranfòse kapasite jounalis yo nan depatman Nòdwès la, atravè lansman twa sesyon fòmasyon ki vize medya tradisyonèl ak medya an liy soti 04 pou rive 06 me 2026 la. Aktivite sa yo reyini plizyè pwofesyonèl laprès nan rejyon an, nan yon moman kote kesyon kredibilite enfòmasyon vin pi enpòtan nan kontèks elektoral.

Pou asire bon jan kalite fòmasyon an, CEP te fè apèl ak plizyè fòmatè ki soti nan zòn metwopolitèn lan, tankou Moclès Débréus, Jean Romel Pierre, Lionel Édouard ak Jessica Michel. Entèvansyon yo te konsantre sou teknik rechèch enfòmasyon pandan peryòd elektoral, ansanm ak prensip etik ak deyontoloji ki dwe gide travay jounalis yo nan sikonstans sansib sa yo.

Daprè responsab yo, objektif prensipal fòmasyon sa yo se ede jounalis yo amelyore fason yo trete ak verifye enfòmasyon, pou garanti yon kouvèti ki responsab, ekilibre ak pwofesyonèl. Yon demach ki kapab kontribye nan ranfòse konfyans piblik la nan medya yo pandan pwosesis elektoral la. ‎