KONKOU POU ANTRE NAN BAWO PÒDPÈ A, YON ETAP ENPÒTAN POU NOUVO AVOKA YO

04/17/2026

Pòdpe, Ayiti ______(TRiboLAND) Lekòl Bawo Pòdpe a, anba direksyon Me Rolin Vilcé, òganize yon konkou jodi jedi 16 avril 2026 la nan Collège Lesly Docteur. Aktivite sa a antre nan kad efò Bawo a ap fè pou kontinye amelyore nivo pwofesyon avoka nan jiridiksyon an, pandan li ap prepare nouvo jenerasyon pratikan dwa yo.

Yon total 14 lisansye nan Syans Jiridik patisipe nan konkou sa a, ak objektif pou entegre yon nouvo pwomosyon. Inisyativ sa a pèmèt Bawo a verifye konpetans ak kapasite kandida yo avan yo menm fini tout pwosedi legal ki mennen yo nan prete sèman kòm avoka.

Egzamen an make premye etap seleksyon an, paske apre faz ekri a, kandida yo ap gen pou pase yon tès oral. Pwosesis sa a vize asire sèlman pi kalifye yo rive franchi baryè a, pou garanti yon sèvis jistis ki pi serye ak pwofesyonèl nan sosyete a.