Nouvo batonye bawo jiridiksyon Tigwav la, Mèt Joachin Delpêche denonse fason 9 manm konsèy prezidansyèl la (CP) rive nan tèt peyi a.
04 – 29 – 2024
Tigwav, Ayiti ___(TRiboLAND) Nouvo batonye bawo jiridiksyon Tigwav la, Mèt Joachin Delpêche, nan yon interview li akòde ak laprès nan biwo li, samdi 27 avril 2024 la, nan lide pou denonse fason enstans ki konsène yo moute konsèy 9 manm prezidansyèl la (CP) pou mennen bak peyi a. Mèt la estime, demach yo ilegal, e yo pa respekte previzyon konstitisyonèl yo, ki daprè li, lalwa trase koman pou yon moun rive dirije peyi Dayiti.
Mèt Joachin Delpêche pa pase nan plizyè chimen kochi, pou-l fè konnen li pa atann anyen serye ak nouvo CP 9 manm nan, li kwè se 9 nouvo rich ki pral genyen nan peyi, se 9 nouvo kòtèj anplis e chak kòtèj yo pral genyen pou pipiti 10 machin gwo figi, se 9 nouvo pati politik ki pral kreye anplis, se plis ajan sekirite ki pral kreye pou ogmante lajan bidjè peyi a, se 9 nouvo baz politik ki pral pran nesans nan chak katye, se 9 nouvo kòwonpi anplis elatriye ki pral simaye kòripsyon epi dechèpiye tirès manmèl bèf chèch la.
Delpêche finalman deklare sistèm politik ayisyen an, se yon sistèm ki pa chita sou baz konstitisyonèl, sou baz ideyoloji, sou baz edikasyon ak moral; politisyen yo fè sa, yon fason pou yo kapab manipile pèp ayisyen an pou mennen li nan kawo politik, sosyal, ekonomik, ensekirite ak kiltirèl.
Yon lòt kote, nouvo batonye bawo jiridiksyon Tigwav la, denonse epi kondane ekip mesye dam ki patisipe nan efondre peyi a, mete li nan sitiyasyon difisil li twouve li jounen jodi a. Konsa, se menm yo menm nan ki fofiile kò yo nan nouvo konsèy 9 manm prezidansyèl la (CP) yon fason pou antere li pifon nan twou epi eseye wè koman yo kapab rejenere tèt yo pou kontinye dechèpiye lajan leta.
