Sen Lwi Dinò: Bandi sangwen kidnape direktris lekòl, Felicienne Dolcé anndan lakay li

04/02/2022

Sen Lwi Dinò_____(TRiboLAND) Popilasyon Sen Lwi Dinò a leve anba gro konstènasyon lè yo aprann bandi sangwen kidnape vè 1: 00 douvanjou maten samdi 2 avril 2022 a, Felicienne Dolcé, madanm Pastè Dolcé byen koni nan vil Sen Lwi Dinò.

Selon sa ke jounalis senyò Joseph Leslie rapòte bay TRiboLAND, fanmiy Dolcé a te konnen yon lanjelis dimaten ki te troublan, sakaje, entimide e maltrete anba atak yon group nèg ame ki pa idantifyàb e ki te anvayi lakay yo nan komin Sen Lwi Dinò byen bonè nan lanjelis maten samdi 2 avril la.

Bandi ame yo ki tap tire nan plizyè direksyon, tap eseye tronpe vijilans vwazinay e te arive penetre anndan lakay fanmiy lan e menm arive kidnape san oken pretèks madanm Pastè Dolcé ki se Felicienne Dolcé, direktris  lekòl piblik Lamenais nan Sen Lwi Dinò.

Selon enfòmasyon yo, bandi sangwen yo ta sanble aprè dap piyanp lan, yo te pran direksyon yon lokalite ki rele Gaspa, ki lokalize a kèlke kilomèt komin Sen Lwi Dinò.