Yèswa nan Huston, Tekzas seleksyon nasyonal-la rafle kanada 3 gòl a 2 e jwenn an gran moun kalifikasyonli pou demi-final Gòl Kòp 2019 la. Avèk yon skò ki te reyèlman degoutan nan premye mitan lòske Jonathan David ki yon natif Ayisyen te make ansanm avèk ko-ekipye kanadyen li, Lucas Cavallini yon skò kraze manm 2 gòl a 0 nan premye 18 minit match la.
Espwa Grenadye yo pat pèdi. Retounen ekip-la apwè seyans motivasyon ak konsinn nan vestyè yo, ekip nasyonal te pwezante yon lòt kalite jwèt trè desizif ki ta pwal desann fe ak chalè Kanadyen yo. Nan sèlman 4 a 5 minut, Grenadye yo ta pwal chanje skò-a avèk yon erè pòtye kanadyen-an, Milan Borjan ki fasilite nimero 50 ekip nasyonal-la, Duckens Nazon manipile rediksyon skò-a.
Detèminasyon Grenadye yo ak dezi pou mete do ekip Kanada-a atè tap manifeste nan nannan jwèt-la. Apwè plizyè menas de tir, ou pwal vinn jwenn yon Hervé Bazile ki pwal benefisye yon abi fizik gadyen kanadyen-an ki okazyone egalizasyon skò-a avèk yon penalite. Grenadye yo te kontinye ap kenbe nan lalwèt ekip advès-la sou enjenyozite yon petit gason Pò a Piman, Wilde Donald Guerrier ki finalman demantle sistèm defans kanadyen ansanm ak gadyen-an granmesi yon lob imajinè ki fasilite yon fwap manman penba.
Tou swit apwè konpetisyon an, Ayiti pat pwan tan pou antre nan yon ebilisyon kè kontan. Plizyè katye atravè peyi-a, espesyalman nan kapital-la tap manifeste nan yon konsè klaksònn machinn ak bann apye, muzik vaksinn avèk konplisite lakannay Petwo bizango. Nan Pòdpè, se te efori san zatann; plizyè kwoup katye, malgre anviwònnman blackout, pat kache kontantman yo nan mete soupye bwit sou kou anbyans lago lago pou onore viktwa seleksyon nasyonal-la. Tandiske, nan fwaye yon sitwayen notab nan vil-la, Leython Corneille, yon jwè foutbòl 6 lane ki tap kriye sanrete nan premye mitan match la, ekspwime yon kontantman enpekab ki te anpeche-l pwan wout kabann.
Konsa Ayiti kalifye pou demi-final! Peyi-a ki deja an ebilisyon kase randevou pou yon lòt match istorik Samdi ki san dout pwal leve imaj yon peyi ki deja gen twòp pou kòl.
Jacob Bendallahm, TRiboLAND
