NAN YON LÈT PASTORAL, DYOSÈZ PÒDPÈ A MANDE TOUT MOUN ANGAJE YO POU YO BATI YON LEGLIZ SINODAL
10/22/2026
Pòdpè, Ayiti _____(TRiboLAND) Evèk Pòdpè a pibliye yon lèt pastoral ki adrese ak klèje a, moun ki konsakre yo, tout fidèl yo ansanm ak tout gason epi fanm ki gen bon volonte nan dyosèz la. Nan lèt sa a, Monseyè Charles Peters Barthélus, evèk Pòdpè a, mete aksan sou nesesite pou tout moun mache ansanm nan konstriksyon yon Legliz sinodal, nan kad tèm « Tout ansanm pou yon dyosèz sinodal ». Demach sa a antre nan aplikasyon rezolisyon sinòd sou sinodalite Legliz inivèsèl la, apre 16e asanble jeneral sinòd evèk yo te fini.
Nan lèt pastoral la, evèk la souliye misyon evanjelizasyon an se responsablite tout moun, pandan li envite fidèl yo angaje yo ak plis zèl nan lavi Legliz la. Li mete aksan sou konvèsyon kè, konvèsyon pastoral, fratènite ak konvèsyon ekolojik kòm eleman fondamantal pou renouvèlman Legliz la. Nan sans sa a, li ankouraje pawas yo, chapèl yo, kominote relijye yo, mouvman yo ak divès asosyasyon fidèl yo nan sis depatman pastoral dyosèz la pou yo adopte yon fason travay ki chita sou dyalòg, koute lòt moun, patisipasyon ak pataj responsablite.
Pou mete vizyon sa a an aplikasyon, Monseyè Charles Peters Barthélus fè konnen deja gen yon ekip sinodal dyosezen ki sou pye, ki pral sèvi kòm estrikti kowòdinasyon pou ekip sinodal pawasyal yo epi ankouraje aplikasyon mekanis patisipasyon ki nesesè yo. Li lanse yon apèl espesyal bay prèt yo ak kolaboratè ki pi pwòch yo pou yo mete tout kè yo nan demach sa a, yon fason pou tout dyosèz la avanse nan menm direksyon an. Nan fen lèt la, ki date 21 oktòb 2026, jou ouvèti ane pastoral la ak presbiteryòm nan, Evèk la envoke pwoteksyon Vyèj Mari pou ede dyosèz la vin yon kominote ki pi fratènèl, pi dinamik epi pi angaje nan evanjelizasyon.
