Ouwagan Dorian, ouwagan ki pi tèrib ke Bahamas pa janm konnen touye omwens senk moun nan zile Abako yo, dapwè Minis Hubert Minnis deklare jodi Lendi 2 Septanm 2019.
“Nou nan mitan yon veritab trajedi istorik nan plizyè rejyon nan Nòdwès Bahamas”, selon Minnis nan yon konferans pwès.
Dorian te ateri avèk yon estati kategori 5 sou lil Gran Bahamas ayè Dimanch swa, kraze bwize sou tout sa li jwenn sou wout li: kay, batiman e kite yon pakèt sitwayen de bwa balanse.
Koulya li devni yon kategori 4 e li kontinye ap wonfle nan divès zile ki an malmakak. Ekspè metewolojik yo anonse lap vanse danjerezman sou Florid pita aswè-a kote gen plizyè milyon Ameriken ki anba evakyasyon mandate.
