Jan sa te prevwa, Fondasyon TRiboLAND klotire 2 jounen fòmasyon gratis sou dekorasyon nan Montòganize
08 – 13 – 2024
Montòganize, Ayiti_____(TRiboLAND) Plis pase 90 jèn fi ak jèn gason konplete nan lokal detant “COFESMO”, 2 jounen atelye travay sou dekorasyon avèk afloral apwèmidi madi 13 dawou 2024 la nan komin Montòganize.
Se avèk yon ekip solid ki genyen nan tèt li Enjenyè Louendy Jean, an konplisite avèk Madam Ella Mirtyl ak Sè Marie ke yon parèy sòlòkòtò aprantisaj te reyalize nan Ganize. Se yon veritab chantye ki te reyini yon latriye jèn ki te soti nan diferan ra kwen komin nan; yon okazyon ki te mete anpil chalè avèk antouziasm sou vizaj yo.
Se konsa, promès fèt e promès delivre, atravè yon fòmatè chevrone ki te leve ekspètizm li nan dimansyon fòmasyon an ki te reyèlman yon lòt nivo.
Ankò yon lòt fwa, Fondasyon TRiboLAND mete souri nan vizaj yon bon valè jèn ki te swaf yon konpetans abilite ki kapab pèmèt yo fè fas kare ak lavi di ak eksplwatasyon.
Nap raple, Fondasyon TRiboLAND ki genyen nan tèt li “Papa Loulou”, deja genyen 2 lòt fòmasyon gratis ki nan faz preparasyon nan lokalite Montri, Zile Latòti ak Sèka Lasous.
Waw ala bèl bagay lè TRIBOLAND ap mete konesans nan tèt jèn yo mw voye yon gwo kout Chapo Pou PDG Loulou Pou bon travay lap fè nan popilasyon an
TRIBOLAND latortue
Ouffffff 💓Mwen remèsye tout Ekip TRIBOLAND lan pou konesans yo mete nan tèt jèn yo espesyalman mwen menm mwen se yon jèn Montòganize kite jwenn chans patise nan 2 jou fòmasyon TRIBOLAND te ofri bay jèn lakay mwen pagen ase mo pou remèsye nou Bondye va beni nou pou sa.
Mèsi DG papa Loulou 🎉 🎉🎉