Senlwidinò: Yon group asasen tante asasinen jounalis Pierrilien Colly nan moman li t’ap antre lakay li
07 – 18 – 2024
Senlwidinò, Ayiti _____(TRiboLAND) Plizyè endividi tante asasinen jounalis Pierrilin Colly nan lannwit madi 16 jiyè 2024 la nan moman li t’ap eseye antre lakay li. Daniel Ange Pierrilien (kouzen viktim) ak John Komensky se non 2 malfwa ki tap tante touye jounalis la.
Daprè jounalis Pierrilin Colly, 2 mesye yo te tann yon zatrap pou li nan antre lakay li. Pandan l’ap antre aprè li te sot fè yon repòtaj nan fèt Glasikouwo, mesye yo kòmanse bat li jiskaske yo andomaje tou 2 ponyèt li.
Endividi sa yo ki vle mete baboukèt nan bouch jounalis Pierrilien Colly kap fè travay li kòmsadwa, gen pwoblèm ak li paske lap denonse zak malonèt kap fèt nan awondisman Senlwidinò a.
Jounalis la ki nan yon sitiyasyon kritik mande konkou lapolis ak lajistis pou fè limyè sou sak pase a, yon fason pou mete malfwa sa yo kap pèsekite travayè laprès yo kap kenbe popilasyon an enfòme.
Pandan agresè yo an kaval, yon manda darè deja desene kont malfwa yo ke lajistis ap cheche tankou chyen fou.
