Pòt a Piman leve kanpe, popilasyon an egzije reparasyon ijan lopital la
05/04/2026
Pòt a Piman, Ayiti _____(TRiboLAND) Sitwayen nan komin Pòt a Piman, ansanm ak plizyè manm dyaspora a, lanse yon petisyon pou mande reparasyon ijan lopital komin nan ki te sibi gwo domaj apre tranblemanntè 14 dawout 2021 an.
Lopital sa a, ki te inogire an 2011, te reprezante yon gwo espwa pou plis pase 170 mil moun sou kòt Sid la. Jounen jodi a, li ap fonksyone ak anpil limit nan kondisyon ki pa fasil pou ni pasyan ni pèsonèl medikal.
Nan petisyon an, siyatè yo denonse mank sèvis, absans swen espesyalize, ansanm ak transfè pasyan ki fèt souvan pou ale Okay. Yo fè konnen sitiyasyon sa a konn mete lavi moun an danje, paske anpil pasyan pa rive jwenn swen alè. Dapre yo, eta aktyèl lopital la pa koresponn ak bezwen ijans popilasyon an.
Yo lanse yon apèl bay Ministè Sante Piblik ak Popilasyon pou pran mezi rapid pou repare bilding lan epi ranfòse pèsonèl medikal la. Pou yo menm, se yon kesyon diyite ak dwa fondamantal pou chak sitwayen jwenn aksè ak swen sante ki merite nan pwòp komin yo.
