Pak Sen Monfò nan Pòdpe : Soti nan Tan Glwa rive nan Abandonn, Kilè Espwa a ap Renouvle?

03/03/2026

Pòdpe, Ayiti ______(TRiboLAND) Nan kè vil Pòdpe, Pak Sen Monfò te konn briye tankou yon senbòl espwa ak rasanbleman pou jenès la. Pandan plizyè ane, teren sa a te atire foul fanatik pandan Koup Sen Monfò ak chanpyona vakans yo, kote disiplin ak bon jan òganizasyon te toujou bay randevou. Li te plis pase yon senp espas foutbòl; li te yon zouti sosyal ki te ede kenbe jèn yo lwen delenkans epi ankouraje solidarite nan kominote a. Jodi a, malerezman, ansyen lakou glwa sa a tounen yon espas neglije, viktim move jesyon ansyen komite ki t ap dirije l ansanm ak pasivite kèk responsab konsène yo.

Degradasyon Pak Sen Monfò a pa sèlman afekte espòtif yo, men li touche dirèkteman lavi plizyè timoun ak fanmi. Teren an sèvi tou kòm espas rekreyatif pou elèv lekòl presbiteral Sen Monfò yo, ki wè chak jou kijan anviwònman yo ap pèdi valè li. Anpil jèn ki grandi sou teren sa a ap leve vwa yo pou mande restorasyon li, paske yo konprann enpòtans yon espas ki an sante pou devlopman fizik, mantal ak sosyal yo. Pou yo, Pak la pa dwe rete yon senbòl nostalji, men li dwe retounen yon sous fyète pou tout vil la.

Jodi a, kesyon an poze klè: kiyès ki pral pran responsabilite pou sove Pak Sen Monfò? Kominote a ap tann yon angajman konkrè bò kote responsab Legliz la ak lòt aktè konsène yo pou mete sou pye yon plan reyabilitasyon serye. Retabli teren sa a pa ta sèlman yon aksyon pou espò, men yon desizyon estratejik pou sekirite ak avni jenès Pòdpe a. Tan an rive pou aksyon ranplase silans, pou Pak Sen Monfò rekòmanse ekri bèl paj listwa li.