Degradasyon anviwònman an ap ogmante nan vil Pòdpe, sitwayen mande otorite yo aji
09/10/2026
Pòdpe, Ayiti ______(TRiboLAND) Degradasyon anviwònman an ap pran yon dimansyon pi enkyetan nan vil Pòdpe, kote plizyè espas piblik ak zòn abitan yo ap fè fas ak pwoblèm fatra, kanal bouche ak lòt fòm polisyon. Sitiyasyon sa a bay anpil sitwayen gwo kè sote, sitou akoz enpak li kapab genyen sou sante popilasyon an ak kalite lavi moun k ap viv nan komin nan.
Dapre plizyè sitwayen, absans yon sistèm efikas pou ranmase ak jere fatra ansanm ak mank entèvansyon regilye nan kèk zòn ap kontribye nan agrave pwoblèm nan. Yo estime degradasyon anviwònman an pa sèlman yon kesyon estetik, men li reprezante tou yon menas pou sante piblik, sitou lè fatra ak dlo sal rete akimile pandan plizyè jou. Sitwayen yo mande tout aktè konsène yo pran responsablite yo pou mete sou pye aksyon konkrè ak dirab.
Devan sitiyasyon sa a, plizyè vwa ap mande otorite lokal yo ak sèvis leta ki konsène yo aji prese pou amelyore jesyon fatra, netwaye kanal yo epi ranfòse sansibilizasyon sou pwoteksyon anviwònman an. Yo ankouraje tou popilasyon an pou kolabore nan efò sa yo, paske dapre yo, amelyorasyon kondisyon anviwònman vil Pòdpe mande patisipasyon otorite yo ansanm ak sitwayen yo.
