Direktris Lycée Célie Lamour an denonse enspektè yo lan kap pèsekite-l

09 – 04 – 2024

Jakmèl, Ayiti ______(TRiboLAND) Direktris Lycée Célie Lamour an, Madam Gabriel Confident denonse enspektè zòn li an kap pèsekite-l. Daprè Direktris la, enspektè yo ap pèsekite-l akoz li enpeche enspektè yo fè magouy nan lis desizyon fen dane yo. Sa lakoz chak jou ki jou lap resevwa lèt pou al reponn kesyon nan biwo enspeksyon an.

Madam lan kontinye pou li di, desizyon fen dane ki nan achiv lekòl la, se pa yo ki nan Direksyon depatmantal edikasyon an. Fouye zo nan kalalou pou chèche konnen sa ki ta lakoz sa; enspektè yo toujou deklare se Direktè avan-l lan ki te konn fè erè yo. Divès fwa li voye desizyon fen dane a, enspektè yo chanje yo epi rele-l pou mande-l modifye sa li genyen nan Direksyon lycée a.

Depi lè sa, enspektè yo ap make-l atravè tout dokiman li soumèt nan Direksyon depatmantal la. Madam lan kap dirije Lycée a depi nan lane 2017, pale ak laprès pou fè popilasyon an konnen pèsekisyon lap sibi, epi di mesye enspektè yo li pa enpeche yo fè magouy, pou yo kite-l anrepo.

Edikasyon nan peyi Dayiti ap pèdi valè chak jou ki jou, sitou ak divès responsab ki fè-l tounen biznis pèsonèl yon fason pou yo regle zafè yo. ‎