Divès pèsonèl sante nan Nòdwès denonse otorite sanitè yo ki manje lajan kovid 19 la, pandan ke yo menm pa janm touche.
05 – 30 – 2024
Pòdpè, Ayiti ______(TRiboLAND) Divès pèsonèl sante nan Lopital Imakile Konsepsyon an, pran mikwo Laprès yon lòt fwa ankò pou denonse mechanste otorite sanitè yo nan depatman ak nan nivo santral ki manje lajan kovid 19 la, pandan yo fè yo travay yo pa touche.
Se anba gwo risk yo chape nan moman kowona viris tap ravaje mond lan, depi nan lane 2021 yo travay; pa gen oken volonte bò kote responsab yo nan depatman pou arive peye yo. Yo sèlman resevwa yon prim derisk anviwon 15 mil goud.
Divès nan pèsonèl sa yo pa mete dlo nan bouch pou takle Direktè Sanitè Nòdwès la, Dr Tony Monestime pandan yo ta vle fè kwè se konfyolo li ak nèg Pòtoprens ki manje lajan kovid 19 la.
Medsen, Enfimyè ak Ti pèsonèl sa yo di yo pap kanpe nan mande lajan, ki se swè yo ak lavi yo, yo te riske pou fè li. Yo mande DSNO ak MSPP pran responsablite yo, peye yo lajan travay yo.
