LATÒTI : YON DAM ANSENT MOURI AK KOUT KOUTO NAN ZÒN FON KIYÈZ, NAN SEPARE YON BATAY
10/22/2026
Latòti, Ayiti ____(TRiboLAND) Yon zak vyolans ki bay gwo kè sote rapòte nan zòn Fon Kiyèz, sou zile Latòti, kote yon dam ki te ansent 8 mwa ki idantifye sou non madam Aricier pèdi lavi li anba kout kouto. Daprè enfòmasyon ki disponib yo, ensidan an rive pandan mari dam nan te nan yon altèkasyon ak yon lòt moun. Dam nan ta pral entèvni pou separe batay la, men li vin viktim yon atak ak kout kouto ki lakòz lanmò li.
Daprè menm enfòmasyon sa yo, se pandan li t ap eseye mete fen nan diskisyon an dam nan ta resevwa kout kouto a. Lanmò li, sitou nan sikonstans kote li te ansent, reprezante yon gwo dram pou fanmi li ak kominote a. Sepandan, detay egzak sou dewoulman ensidan an, idantite moun yo sispèk la ak mezi otorite yo pran poko disponib.
Nan sans sa a, popilasyon an envite rete vijilan epi, si yon moun ta kwaze ak moun yo sispèk la nan zòn lakay li, li ta dwe avèti brigad ki pi pre a. Li enpòtan pou otorite konpetan yo mennen ankèt pou klarifye sikonstans trajik sa a epi pou lajistis kapab pran mezi lalwa prevwa yo.
