Pòdpe: Anviwon 600 Kandida Patisipe nan Konkou Admisyon EDEPP pou Pwomosyon 2026-2030 lan
10/20/2026
Pòdpè, Ayiti _____(TRiboLAND) Lekòl Dwa ak Ekonomi Pòdpè a (EDEPP) òganize, jounen dimanch 18 oktòb 2026 la, konkou admisyon pou rekrite nouvo etidyan pou pwomosyon 2026-2030 an. Anviwon 600 kandida te patisipe nan egzamen an, ki te evalye konesans yo nan twa matyè prensipal: fransè, matematik, konesans jeneral ak filozofi. Aktivite sa a make yon etap enpòtan pou jèn ki swete antre nan domèn etid jiridik nan depatman Nòdwès la.
Se administrasyon EDEPP a, ki gen nan tèt li Madam Katia Pierre Louis, Mèt Estimond Joanel, Mèt Ansy Clerizier ak tout lòt kolaboratè yo, ki te pran dispozisyon pou pèmèt egzamen yo dewoule nan bon kondisyon, nan lokal lekòl Fatima ak Eureka. Daprè temwayaj plizyè kandida, konkou a te dewoule nan yon klima disipline, sa ki te pèmèt patisipan yo konpoze nan yon anviwònman ki te favorab pou evalyasyon an. Òganizasyon egzamen an te bay administrasyon an opòtinite pou teste kapasite kandida yo anvan seleksyon nouvo pwomosyon an.
Reyaksyon kandida yo te pataje ant satisfaksyon ak kèk enkyetid. Pandan plizyè ladan yo te eksprime satisfaksyon yo pou fason konkou a te dewoule, gen lòt ki te fè konnen yo pa t santi yo twò alèz pandan egzamen yo, sitou paske sa gen kèk tan depi yo te kite lekòl. Malgre diferans nan enpresyon sa yo, rezilta konkou a ap detèmine kandida ki pral jwenn chans pou antre nan pwomosyon 2026-2030 Lekòl Dwa ak Ekonomi Pòdpè a, yon etap ki ka louvri pòt sou yon nouvo avni akademik ak pwofesyonèl pou jèn sa yo.
